LAPU-LAPU CITY-Napalgan nga wala nay kinabuhi ang usa ka 66-anyos nga American national sulod sa usa ka inn sa Brgy. Pajo dakbayan sa Lapu-Lapu niadtong Marso 25.
Gitago sa pangalan nga ‘Joe’ ang biktima, usa ka retirado nga American national, ug lumad nga taga New Jersey sa Estados Unidos.
Basi sa initial nga impormasyon, nasayran nga ang biktima nicheck-in uban sa iyang mahuyang nga hinigugma.
Apan, sa dihang gipukaw kini sa iyang partner nga transgender kay nabantayan niini nga wala na kini nagginhawa.
Daling mitawag ang iyang partner sa mga hotel staffs aron mangayo og tabang ug sila na usab ang mitawag og emergency responders nga mao nay mideklarar nga mitaliwan na ang langyaw.
Matud ni Police Lt. Col. Christian Torres, ang tigpamaba sa Lapu-Lapu City Police Office nga wala silay nakita nga foul play sa kamatayon sa 66-anyos nga American national.
Ingon man nga cardiac arrest ang gitumbok nga hinungdan sa kamatayon sa langyaw.
Nakontak na usab ang pamilya ni ‘Joe’ ug dili na nila kini ipaubos sa autopsy gumikan daan na kini nga adunay gihambin nga sakit sa kasing-kasing.
Hinungdan nga gikonsiderar sa kapulisan sa Lapu-Lapu nga case closed na ang maong kaso tungod kay natural death lamang kini.
