Nakit-an ug nakuha sa mga sakop sa Cebu City Disaster Risk Reduction and Management Office (CCDRRMO) ang mga patayng lawas nga gituohang iya sa usa ka 24-anyos nga lalaki nga nawala, gikan sa usa ka bakanteng lote sa Citilink, Barangay Pahina Central, Siyudad sa Sugbo, niadtong Lunes sa hapon, Oktubre 19, 2026.
Ang inahan sa biktima, si Banet Viernes, miila sa patayng lawas isip iya sa iyang anak nga si Isaac Virgel Viernes, usa ka residente sa Baskio, Basak Pardo, kinsa nawala sulod sa gibana-banang duha ka semana.
Matod niini, dili na niya mailhan ang nawong sa iyang anak, apan nailhan niya kini pinaagi sa gisul-ob niini nga underwear nga kolor itom ug pula.
Sumala sa inahan sa biktima, adunay nagpahibalo kaniya nga ang lawas sa iyang anak gilubong sa maong lugar, gitabonan og semento, ug gisagolan og uling.
Hinungdan nga dali kining nangayo og tabang sa kapulisan ug sa CCDRRMO, kinsa maoy mikuha sa patayng lawas.
Base sa impormasyon gikan sa kapuyo sa biktima, ang biktima nag-inom uban sa iyang mga higala sa San Nicolas Proper, diin giingong nakasugat siya og panaglalis batok sa usa ka tawo. Sa CCTV footage, makita siya nga naglakaw subay sa N. Bacalso Avenue uban sa iyang mga kauban. Human niadto, wala na siya mahikit-i sa ilang balay.
Sa pagkakaron, kasamtangang pang giimbestigaran sa mga kapulisan aron sa mga responsable sa krimen, ug ang mga tawo nga giisip nga “persons of interest” ipatawag aron kuhaan og pamahayag.
Gisusi usab sa mga awtoridad ang mga CCTV footage gikan sa mga lugar diin katapusang nakita ang biktima, matod pa sa pangulo sa CCDRRMO nga si Dave Tumulak.
