Personal nga gisusi sa kadagko-an sa Dakbayan sa Sugbo ang nahugno nga dalan duol sa may Patria de Cebu sa dihang nakadawat kini og report mahitungod sa dalan nga ni-‘cave in’.
Sa pakighinabi sa Bombo Radyo Cebu News Team ngadto kang Cebu City Vice Mayor Raymond Garcia, gilantawan niini nga tungod sa nasinati nga pag-uwan sa syudad hinungdan nga mihumok ang mga yuta nga miresulta sa pagdahili sa mga kayutaan.
Dugang pa sa bise mayor nga tungod sa mga nahitabo, magpahigayon kini og usa ka engineering interbensyon arun dili na mograbe ang ‘soil erosion’ hilabi na ang anaa sa mga ibabawng bahin sa Cebu City.
Subay niini, gimandoan ni Garcia nga mapadali ang pagtrabaho sa maong dalan arun malikayan ang bug-at nga trapiko sa maong lugar lakip na ang kaluwasan sa mga pipila ka nagpuyo duol sa area.
