CEBU CITY-Padayon karong gipangita ang 25 anyos nga lalaki human gi-karnap ang patrol car sa Special Weapons and Tactics (SWAT) kagahapon sa hapon.
Giila ang suspect nga si Ricarti Lascoña Cantano, residente sa Purok Cadahu-an, Brgy. Lutac dakbayan sa Naga, Cebu.
Matud ni PCI Roderick Gonzales ang hepe sa Naga City PS nga gi-abandonar sa suspek ang patrol car sa may quarry sa Brgy. West Poblacion sa naasoy nga siyudad human gikarnap.
Una niini, matud pa miresponde ang duha ka police officer ug usa ka social worker sakay sa naasoy nga patrol car sa Brgy. Lutac kung diin nagpuyo ang suspect tungod kay gireklamo kini nga nangulata sa iyang 15 anyos nga live in partner.
Giingong hubog si Cantano sa dihang maabtan sa mga pulis hinungdan nga gisakay kini kauban ang iyang kapuyo sa patrol car. Sa dihang nasulod sa sakyanan ang suspek, matud pa gibanga-banga niini ang iyang kaugalingon sa patrol.
Tungod niini,minaog ang mga pulis ug gibalhin ang 15 anyos nga kapuyo sa suspek sa likod nga bahin sa sakyanan hinungdan nga nabiyaan ang suspek sa front seat.
Taud-taud pa kalit nalang nga misutuy ang patrol car gumikan kay gidrivan na diay sa hubog nga suspect.
Pila ka oras ang nakalabay, dunay nakareport nga adunay abandoned patrol car nga napalgan sa may quarry ug sa dihang miresponde ang mga pulis, wala na didto ang suspect.
Subay niini gi-ahwag sa kapulisan nga musurrender ngalang ang suspek ug kung dili, pasakaan kini og kaso nga carnapping karong adlawa gawas sa atubangon niini nga kaso kalabot sa pagpangulata niini sa minor de edad nga live in partner.
