CEBU CITY- Gikondena sa journalism educator nga si Prof. Danilo Arao ang mga pahayag ni Senador Rodante Marcoleta batok sa media workers, nga iyang gihulagway nga seryosong akusasyon nga nagkinahanglan og lig-ong ebidensya.
Sa interview sa Bombo Radyo, matud ni Arao nga bisan pa sa pagpangayo og pasaylo ni Marcoleta human sa Senate hearing, wala pa gihapon siyay nakita nga konkretong lakang aron masiguro nga dili na mausab ang susamang mga pahayag batok sa media.
Gipasabot ni Arao nga adunay “pattern” ang mga pagbatikos ni Marcoleta sa media ug nagpakita kini, matud niya, sa usa ka pagbati sa “entitlement” diin nagdahom ang ubang politiko nga pirming paborable ang coverage nga ilang madawat gikan sa media.
Gikondena usab niya ang mga pahayag ni Senador Alan Peter Cayetano nga may kalabotan sa media coverage, ug giingong dili responsibilidad sa mga newsroom ang pagsiguro nga mahatagan og dakong espasyo o paborableng pagtagad ang mga politiko sa ilang mga balita.
Samtang adunay mga nanawagan nga kasuhan si Marcoleta tungod sa iyang mga pahayag, matud ni Arao nga wala siyay makita sa pagkakaron nga klarong balaod nga mahimong nalapas sa senador.
Hinuon, iyang giingon nga mahimong ikonsiderar ang pagpasaka og ethics complaint sa Senado aron masusi ang maong mga pahayag ug binuhatan.
Nanawagan usab si Arao sa mga media organizations ug journalists nga magpabiling mabinantayon batok sa mga lakang nga posibleng makapugong sa kagawasan sa pamamahayag, lakip na ang mga panukalang balaod nga mahimong magamit aron makontrol ang sulod sa mga balita ug komentaryo.
Giingon niya nga importante nga ipadayon sa media ang ilang papel isip tigbantay sa katilingban ug dili mahadlok sa mga pagbatikos o mga akusasyon nga walay lig-ong basihan.
Sa iyang mensahe ngadto sa mga media practitioners, ilabina sa mga reporters nga nag-atubang sa daghang hagit sa ilang trabaho, giawhag sila ni Arao nga magpadayon sa responsableng pagbalita ug pagtuman sa ilang katungdanan alang sa publiko.
Giingon niya nga ang mga pahayag nga nagdaot sa kredibilidad sa media kinahanglan tubagon pinaagi sa kamatuoran, propesyonalismo ug pagpanalipod sa press freedom ug editorial independence, nga maoy pundasyon sa usa ka demokratikong katilingban.
