Gisuspenso sa Philippine Basketball Association (PBA) si referee Jeff Tantay tungod sa missed foul call sa duwa tali sa TNT Tropang 5G ug Meralco Bolts niadtong Enero 14.
Sumala ni PBA Commissioner Willie Marcial, wala makatawag og foul si Tantay batok kang Calvin Oftana (TNT) atol sa clutch time sa Game 5 sa TNT-Meralco semis series.
Gikataho nga gi-tap ni Oftana ang shooting hand ni CJ Cansino (Bolts) samtang naningkamot kini nga maka-field goal sa katapusang siyam ka segundos sa duwa.
Naglabaw ang Tropang 5G og 1-point, 97-96, ug human sa missed foul call, midaog ang team, 99-96, nga nakakuha sa ilang unang puwesto sa finals sa PBA Season 50 Philippine Cup.
Human sa duwa, gikuwestiyon sa Bolts ang kapakyas ni Tantay sa pagtawag og foul ug ang liga mihimo dayon og aksyon.
Sumala ni Marcial, ang Commissioner’s Office ang modesisyon kung ang suspensyon ni Tantay sulod lang sa pipila ka duwa o sa tibuok conference, diin ang best-of-seven finals gikatakda sa sunod semana.
Sa pagbalik-lantaw sa duwa, si Cansino nakapuntos og career-high nga 36 puntos ug nangulo sa Bolts gikan sa 10 puntos nga biya aron molabaw og 96-91 sa nahabilin nga 27 segundos sa duwa.
