Giklaro sa Korte Suprema ang proseso sa pagpili sa sunod nga Chief Justice.
Matod pa sa tigpamaba sa Korte Suprema nga si Atty. Camille Sue Mae Ting, ang Presidente sa Pilipinas adunay awtoridad sa pagtudlo og bag-ong Chief Justice sa Korte Suprema.
Ang kasamtangang lider sa nasod, si Presidente Ferdinand ‘Bongbong’ Marcos Jr., mahimong mopili sa itudlo alang sa posisyon sa Chief Justice.
Apan, ang pagpili kinahanglang himoon gikan sa listahan sa mga nominado nga giandam sa Judicial and Bar Council (JBC).
Ang bakanteng posisyon sa Korte Suprema kinahanglang pun-an sulod sa 90 ka adlaw, subay sa Artikulo VIII, Seksyon 4 ug 9 sa Konstitusyon.
Samtang, subay sa naandang pamaagi sa Judicial and Bar Council, ang lima ka labing senior nga Associate Justice sa Korte Suprema gidapit nga mag-aplay alang sa posisyon sa Chief Justice isip mga “preferred candidate” o mga kandidato nga gihatagan og prayoridad.
Si Chief Justice Alexander Gesmundo gikatakdang moretiro sa iyang katungdanan karong Nobyembre 6 sa dihang moabot na siya sa edad nga 70.
Tungod niini, si Senior Associate Justice Marvic MVF Leonen ang magsilbi isip Acting Chief Justice, subay sa balaod nga nagmando nga ang labing senior nga associate justice maoy mopuli sa maong tahas.
