METRO MANILA-Kusganong gikondenar ni Presidente Ferdinand Marcos Jr., ang air incident nga nahitabo sa Bajo de Masinloc diin ang multirole aircraft nagpagawas og “dropped flare” sa rota nga giagian sa Philippine Air Force (PAF) nga nagpahigayon og routine maritime patrol sa teritoryo sa nasud.
Hinungdan nga nakighiusa ang Presidente sa pagbarog sa pakighiusa sa mga maisog nga personnel sa PAF.
Matud pa niini nga ang aksyon sa People’s Liberation Army – Air Force (PLAAF) kay dili makatarunganon, ilegal ug walay pagtagad, ilabi na kay kini naglupad sa soberanong kahanginan sa Pilipinas.
Gitataw ni Marcos nga karon nga nikalma na ang dagat, nibalik na ang China ug naghimo na sila og mga delikadong aksyon sa kahanginan.
Gihatagan og gibug-aton sa Presidente nga ang Pilipinas magpabiling komitado sa usa ka diplomatiko ug malinawon nga paagi aron masulbad ang bisan unsang dili pagsinabtanay.
Nanawagan usab kini sa China nga mahimong responsable sa ilang mga aksyon sa dagat man o sa kahanginan.
