Gilunsad ni President Ferdinand R. Marcos Jr. ang Phase II sa Chinatown Revitalization Project sa Binondo, Manila gahapon, Biyernes aron mapreserbar ang kabilin sa distrito samtang gipalambo ang turismo ug lokal nga mga negosyo.
Atol sa opisyal nga paglusad nga gihimo sa Hotel Lucky Chinatown sa Binondo, si Presidente Marcos miingon nga ang proyekto nagpasidungog sa dugay nang relasyon sa pamatigayon ug kultura tali sa Pilipinas ug China.
Human sa kalampusan sa Phase I nga nagpahiuli sa katahom sa Jones Bridge, ang Presidente miingon nga ang Phase II nagtumong sa pagbag-o sa Binondo ngadto sa usa ka madasigon nga sentro sa kultura ug ekonomiya.
Kini usa usab ka kauban sa Pasig Bigyang Buhay Muli Program sa Administrasyon aron mabuhi pag-usab ang Pasig River ug ang mga kasikbit nga komunidad pinaagi sa pagpaayo sa mga pampublikong lugar, modernong sistema sa transportasyon, ug paglimpyo sa mga agianan sa tubig.
Gipasiugda sa Presidente nga ang proyekto alang sa kaayohan sa mga Chinese-Filipino nga nagpuyo sa Binondo, sa tanang mga Manilanon nga mobisita sa lugar matag adlaw, ug sa matag Pilipino nga gusto nga mas masabtan ang kultura ug kasaysayan.
Ang Presidente miingon nga ang proyekto nahimo pinaagi sa lig-on nga kolaborasyon sa gobyerno, pribadong sektor, ug sa Filipino-Chinese community.
