Gipasigarbo ni Presidente Ferdinand Marcos Jr. ang labing taas nga koleksyon sa buhis sa Bureau of Internal Revenue sa miaging 20 ka tuig, nga natala sa P2.8 trilyon ka pesos sa 2024.
Matod niya nga nalabwan pa niini ang P2.5 trilyon nga koleksyon niadtong 2023.
Hinungdan nga misaad pa kini nga pakusgon pa ang mga paningkamot batok sa pagpanikas sa buhis, nga nagpasiugda nga adunay tulubagon ang mga nagpahimulos sa sistema.
Mao kini ang usa sa mga gipadayag ni Marcos atol sa paglusad sa 2025 National Tax Campaign, nga nag-awhag sa mga Pilipino sa pagtuman sa ilang mga responsibilidad sa buhis alang sa kalamboan sa nasud.
Gidayeg usab ni Marcos ang Bureau of Internal Revenue (BIR) tungod sa record-breaking nga koleksyon niini niadtong 2024, nga milabaw sa P2.85 trilyon diin nagtimaan sa unang higayon sulod sa 20 ka tuig nga naabot sa ahensya ang target niini.
Ug ang numero nagrepresentar sa usa ka mahinungdanon nga pagtaas gikan sa P2.52 trilyon nga nakolekta kaniadtong 2023.
Giila usab sa Presidente ang digital transformation initiatives sa BIR, nga nakapasayon sa pagtuman sa buhis alang sa mga negosyo.
Gawas sa pagpausbaw sa mga koleksyon, gidayeg usab niya ang mga proactive nga lakang sa BIR sa pagsiguro sa pagsunod sa buhis.
Ang BIR nihimo og kapin sa 307,000 ka pagbisita ug pag-verify, nga nakabawi og P257 milyones pinaagi sa pagpatuman.
Nanawagan usab ang Hepe Ehekutibo sa mga Pilipino nga ipasigarbo ang ilang tahas sa pagtukod sa nasud, nga nag-ingon nga ang pagbayad sa buhis dili lamang usa ka civic nga katungdanan apan usa ka kontribusyon sa usa ka mauswagon nga kaugmaon.
Iyang gipasaligan ang publiko nga ang mga pundo sa gobyerno bantayan pag-ayo ug gamiton sa epektibong paagi aron masiguro ang nasudnong pag-uswag.
