Pangunahan ni Presidente Ferdinand R. Marcos Jr. ang paghandum sa Araw ng Kagitingan sa Mount Samat National Shrine sa Bataan karong adlawa.
Kini ang sentro nga kalihokan sa Philippine Veterans Week, sumala sa Philippine Veterans Affairs Office (PVAO).
Matud ni Assistant Secretary Domingo Carbonell Jr., PVAO deputy administrator for operations, nga si Marcos ubanan ni Defense Secretary Gilberto Teodoro Jr., ang mga ambassadors sa Estados Unidos ug Japan, Armed Forces of the Philippines chief Gen. Romeo Brawner Jr., ug uban pang opisyal sa gobyerno sa usa ka wreath-laying ceremony aron pagpasidungog sa mga Filipino ug American nga sundalo sa World War kaniadtong tuig 1940s.
Ang Araw ng Kagitingan naghandom sa kabayanihan ug sakripisyo sa mga Pilipino sa panahon sa Ikaduhang Gubat sa Kalibutan ug gihinumdoman ang 1942 nga Pagkapukan sa Bataan sa dihang ang mga pwersang Pilipino ug Amerikano misurender sa Japanese Imperial Army human misukol sulod sa pipila ka bulan gamit ang limitadong armas, bala ug mga suplay.
Matud ni Carbonell nga ang Philippine Veterans Week karong tuiga, nga nagsugod niadtong Abril 5, nagdala sa tema nga “Veterans’ Heroism: Foundation of a Progressive New Philippines.”
