Gipasalig ni Presidente Ferdinand R. Marcos Jr. nga anaa na kini sa maayong kondisyon ug nagpabilin nga himsog aron sa pagtuman sa iyang mga katungdanan, bisan pa sa tambag sa iyang mga doktor nga mopahuway una human nga nadaygnos kini sa diverticulitis.
Ingon man nga nipagawas ang Presidential Communications Office (PCO) og video update sa panglawas ni Marcos, diin nag-inom kini og gireseta nga antibiotic aron matambalan ang diverticulitis.
Pasalig ni Marcos nga okay na kini ug nagpasalamt usab siya sa mga nabalaka.
Namatikdan niya nga ang iyang kondisyon nag-uswag ug nga makakaon na siya og solidong pagkaon human sa mubo nga panahon sa mga pagdili sa pagkaon aron mahupay ang iyang tiyan.
Gipasalamatan ni Marcos ang publiko sa ilang maayong mga pangandoy ug gipasalig nga ang mga operasyon sa gobyerno magpadayon nga walay pagkabalda.
Samtang, gikondenar sa PCO ang pagkaylap og mga fake news sa gihulagway niini nga “hinimo-himo ug malisyoso” nga mga pangangkon bahin sa kahimsog sa Presidente, lakip ang usa ka peke nga dokumento medikal nga gipaambit online.
Ang PCO miingon nga ang Malacañang nagrepaso sa mga legal nga kapilian human sa pagkaylap sa mga hinimo-himo nga dokumento ug bakak nga impormasyon.
Giawhag sa PCO ang publiko nga mosalig lamang sa mga opisyal nga pahayag gikan sa awtorisado nga mga tinubdan sa gobyerno ug dili pagpadako sa wala mapamatud-i ug malisyosong sulud.
