Gimando ni Presidente Ferdinand R. Marcos Jr. ang pagtukod sa modular shelter units isip mas komportable nga temporaryong puy-anan alang sa mga residente nga nawad-an sa pinuy-anan tungod sa bag-ohay nga kusog nga mga linog.
Atol sa usa ka situation briefing niadtong Lunes sa Tarragona, Davao Oriental bahin sa duha ka linog nga miigo sa rehiyon niadtong Oktubre 10, ang Presidente miingon nga ang Department of Human Settlements and Urban Development (DHSUD) magtukod ug 150 ka modular shelter units sa probinsiya alang sa mga biktima sa linog.
Sumala sa DHSUD, ang pagtukod sa modular shelter units magsugod sa sunod Biyernes, aron ang mga apektadong residente makabalhin na sa Lunes.
Ang modular nga mga puy-anan adunay mga batakang pasilidad sama sa kasilyas, suplay sa tubig ug elektrisidad, ug mga komunal nga kusina, ug kini kabahin sa Integrated Disaster Shelter Assistance Program (IDSAP) sa DHSUD.
Kahinomdoman nga ang DHSUD kaniadto nagpadala og modular shelter units sa mga lugar nga grabeng naapektuhan sa Sugbo—partikular sa Daan Bantayan, San Remigio, ug Medellin—agi’g tubag sa linog nga miigo sa probinsiya niadtong Septiyembre 30, subay sa mando ni Presidente Marcos.
Matod ni DHSUD Secretary Jose Ramon Aliling, ang modular shelter units tukoron sa gitawag nga “Bayanihan Villages,” nga gimando sa Presidente nga temporaryong puy-an sa mga naapektuhan sa 6.9 magnitude nga linog sa Sugbo.
