Angayan lang nga silotan ang usa ka police vlogger tungod sa pagsabwag og mga pulong nga bati batok kang Presidente Ferdinand Marcos Jr.
Mao kini ang reaksyon sa Palasyo human gipasakaan og kaso sa Quezon City Police District ang maong pulis.
Kasong inciting to sedition ug paglapas sa Cybercrime Prevention Act ang gipasaka sa police vlogger tungod sa iyang partisan post sa social media.
Giangkon sa Malacañang nga gipahibalo si Presidente Ferdinand Marcos Jr. sa usa ka social media post sa usa ka pulis nga nagpadayag sa iyang panglantaw batok sa pagdakop kang kanhi Presidente Rodrigo Duterte.
Giangkon ni Atty. Claire Castro nga nakurat niini ang presidente ug miingon nga bisan kinsa nga presidente sa nasud makurat sa kinaiya sa maong polis.
Gitataw ni Castro nga adunay nalapas nga binuhatan tungod kay una sa tanan, aktibo siya sa serbisyo ug kinahanglan nga walay gidapigan o non-partisan ang iyang posisyon.
Hinungdan nga angayan lang nga manubag o madisiplina kining maong polis, subay sa nalatid sa balaod.
Sa pagkakaron, alang sa Palasyo, isolated case lang kini, apan iyang gisubli nga kung makakita sila og rason o makamugna og kasamok, dili kini ibaliwala sa gobyerno.
