Taliwala sa kaylap nga mga protesta sa Edsa Shrine ug Luneta Park, si Department of Public Works and Highways (DPWH) Sec. Vince Dizon nagpasiugda sa kamandoan ni Presidente Ferdinand Marcos Jr. nga “hurotan ug tulubagon” ang tanang nalambigit sa kurapsyon sa nasud.
Ang mga protesta naggumikan sa isyu sa mga anomalosong substandard nga flood control projects nga giingong naglambigit sa daghang kurakot nga opisyal sa DPWH, mga kontraktor, ug bisan mga magbabalaod.
Matod ni Dizon, dili mopahuway ang maong ahensya hangtod nga dili mapatuman ang direktiba sa Presidente batok sa kurapsyon sa mga flood control projects.
“Importanteng malaman ng gobyerno ang saloobin ng taumbayan. Makakaasa po sila na lahat ng direktiba ng Pangulo na walang sasantuhin at kailangang managot ang dapat managot ay wala tayong tigil na gagawin,” matud niya.
Matod ni Dizon nga giaksiyonan dayon sa DPWH ang kamandoan sa Presidente, ang pagpasaka og tulo ka kaso ngadto sa Ombudsman, 26 ka indibidwal ang napasakaan og kaso, tulo ka opisyal ang natangtang, samtang 17 pa ang gisuspenso ug gikatakdang tangtangon sa serbisyo sa umaabot nga mga adlaw.
“Kagaya po ng sinabi ng Pangulo, kailangan mula taas hanggang baba ay kinakailangang managot,” dugang ni Dizon, nga nagpadayag og suporta sa mga mulo ug panawagan sa mga nagprotesta.
Si Presidente Marcos bag-o lang nagtukod sa Independent Commission for Infrastructure (ICI) aron masusi pag-ayo ang mga anomaliya sa pagkontrol sa baha ug uban pang mga proyekto sa imprastraktura aron masumpo ang korapsyon.
“They will not be spared. We have no favorites, no one we are protecting. No one will believe it until it is actually done,”siya niingon.
Gibanabana nga 210 ka grupo ang nisalmot sa “Trillion Peso March” sa EDSA Shrine, apil na ang mga unibersidad, kabatan-onan, civil society, ug mga simbahan. Sa Luneta Park, sumala sa Manila DRRMO, kapin sa 49,000 ka tawo ang mitambong sa buntag aron magprotesta batok sa korapsyon.
