Nipadayag si Presidente Ferdinand R. Marcos Jr. sa iyang pahasubo sa mga biktima sa sunog nga migun-ob sa Southern California sa Estados Unidos, nga nagpaabot sa iyang simpatiya hilabi na sa katawhang Pilipino.
Sa usa ka pahayag, gipasiugda ni Marcos nga daghang mga Pilipino ang apektado hinungdan gipaabot niini ang kinahiladman nga simpatiya alang sa tanan nga naapektuhan sa makagun-ob nga wildfire sa Southern California, USA.
Ingon man nga nanghinaot kini nga makabarog sa dali nga panahon ang maong lugar pinaagi sa kusog, kalooy, ug panaghiusa.
Dugang niini nga pag-awhag sa tanan nga magpabilin nga luwas ug mabinantayon taliwala sa nagpadayon nga katalagman.
Kahinumduman nga ang siyudad sa Los Angeles gilamoy sa dili makontrol nga sunog sa kalasangan sulod sa pipila ka mga adlaw, bisan sa pagsingabot sa tingtugnaw, nga nagbilin sa liboan nga walay puy-anan ug nagpahinabog dakong kadaot.
Ug gibanabana nga mokabat sa USD150 bilyon ang danyos, sumala sa US private forecaster nga AccuWeather ug mikalas sa labing menos 13 ka kinabuhi.
