Molarga paingon sa Vatican si Presidente Ferdinand Marcos Jr. kauban ang asawa niini nga si First Lady Liza Marcos aron sa pagtambong sa lubong ni Pope Francis.
Kini ang gikumpirmar ni Palace Press Officer USec. Claire Castro.
Mao kini ang gipahibalo sa Presidene kaniya apan, wala pa miingon kung kanus-a kini molarga paingon sa Vatican.
Unang gipahibalo ni Presidente Marcos nga si Pope Francis mao ang labing maayong Santo Papa sa iyang panahon.
Dugang niini nga ang Pilipinas miduyog sa tibuok Roman Catholic Community sa pagbangotan sa pagtaliwan sa Santo Papa.
Ingon man nga mideklarar kini og pipila ka adlaw nga pagbangotan tungod sa pagtaliwan ni Pope Francis.
Matod sa Presidential Communications Office (PCO), ang nasangpit nga mga adlaw sa pagbangotan magsugod sa Abril 23 hangtod 26, o ang adlaw sa lubong sa Santo Papa.
Sa maong adlaw, ang nasudnong bandera kay ibutang sa half-mast sa tanang government buildings ug government installations sa nasud ug sa gawas sa nasud.
