Nipasidaan ang Philippine Chamber of Commerce and Industry (PCCI) sa laing pagkabalda sa ekonomiya sa nasud, nunot sa pagpahamtang sa US og 17% nga dugang taripa sa mga produkto gikan sa Pilipinas.
Giinsister ni PCCI President Enunina Mangio nga bisan og 17% ang pinakaubos nga gipahamtang sa US sa Southeast Asia, apan maapektuhan gihapon niini ang export sector sa nasud, ilabi na kadtong anaa sa industriya sa pagpanguma ug food processing.
Gipasabot ni Mangio nga dili lang ang dugang nga taripa sa US ang makaapektar sa nasud, kon dili lakip na ang mga panimalos nga giplanohan sa ubang mga nasud nga ipahamtang isip tubag sa mga lakang nga gihimo sa US.
Kung mahiusa ang duha, matod niya, seguradong adunay epekto kini sa ekonomiya sa Pilipinas diin ang remittance ug paggasto sa mga konsumidor maoy duha sa mga nag-unang nagpalihok sa ekonomiya.
Matod niya nga maapektuhan ang global supply chain tungod sa pagpahamtang og dugang taripa sa nagkalain-laing nasud sa mga produkto nga mosulod ug mogawas niini, samtang posible usab nga motaas ang pagduda sa mga investor ug konsumidor tungod sa gipaabot nga pagsaka sa presyo sa mga produkto.
Sa pagkakaron, nagpaabot pa ang PCCI sa tubag sa kagamhanan sa Pilipinas, sa dili pa kini mohimo og kaugalingong lakang, uban sa nagkalain-laing organisasyon sa negosyo sa nasud.
