CEBU CITY — Gisiguro sa Philippine Coast Guard (PCG)-7 nga buhaton ang tanan aron matumbok kung kinsa ang responsable sa pagkasunog sa Lite Ferry 16 nga milarga gikan sa Samboan, Cebu.
Matud sa tigpamaba niini nga si Lieutenant Junior Grade Michael John Encina nga sayron sa gi-umol nga maritime casualty investigation team kung unsa ang mga factors sa pagka-ulbo sa kalayo gikan sa engine room sa maong barko.
Kahinumduman nga mitumaw ang sunog sa passenger vessel, sakay ang kapin 200 ka mga pasahero, sa dihang hapit na sa iyang dungguanan sa Dapitan City, Zamboanga Del Norte.
Nasuta usab ni Encina nga giingong adunay violation ang kapitan sa barko sa Memorandum Circular No. 05-2012 sa Coast Guard o ang Master’s Declaration of Safe Departure gumikan kay wala nila gipasa diha dayon ang kinatibukan-ang manifesto sa wala pa milarga ang barko.
Nasayran nga tulo ang namatay samtang anaa sa luwas nga kahimtang ang 245 ka mga pasahero sa gipahigayong rescue operations sa nasunog nga barko.
