BAJO DE MASINLOC-Gipanghimakak sa Philippine Coast Guard nga gitabangan sa mga personahe sa Chinese Coast Guard ang nangaangol nga mga mangingisdang Pinoy human nibuto ang makina sa ilang sakayan samtang didto sa Bajo de Masinloc.
Matud pa sa tigpamaba sa PCG sa West Philippine Sea Commodore Jay Tarriela, nadugay sila sa pag-abot sa lugar nga nahimutangan sa mga mangingisdang Pilipino tungod kay ang CCG ug uban pang maritime militia boats nibabag, nanghasi ug mihimo pa og mga delikadong maniobra batok sa Philippine Coast Guard vessel nga BRP Sindangan samtang nagpadulong sa Bajo de Masinloc.
Dugang pa, nga nipasidaan pa ang CCG nga ilang dakpon ang mga mananagat nga Pilipino kon dili sila mokooperar.
Bisan pa niini, nakamaniobra ang PCG palayo sa mga rigid hull inflatable boats sa China ug malampusong nabalhin ang mga naangol nga mananagat ngadto sa BRP Sindangan alang sa dinaliang first aid.
Ang opisyal sa PCG mihimo sa pagklaro human ang Chinese state media Global times nagpagawas ug video nga nagpakita sa CCG nga giingong nag-isyu og mensahe sa radyo nga nag-ingon nga nagpahigayon kini og rescue operation.
Gipakita usab niini nga ang CCG mipakatap og mga inflatable boat, nanghatag og lifebuoy ug life jacket sa mga mananagat nga nagkarga sa nalunod nga Filipino boat ug giingong mitabang sa Pinoy nga mananagat.
Ang habig sa PH madungog nga nagpadala ug mensahe sa radyo nga nagpasalamat sa CCG vessel 3105 sa ilang kooperasyon.
Una nang giangkon ni PCG Spokesperson Rear Admiral Armand Balilo nga nitanyag og tabang ang CCG apan wala mosugot ang mga mananagat nga Pinoy tungod kay nag-pa-abot sila sa PCG.
Apan matud ni Comm. Tarriela, nga ang Chinese state media naglisud sa pag-edit sa ilang mga video karong panahona.
Gitawag usab nga bakak ang gi-upload nga video.
Matod niya nga usa sa mga pruweba nga ilang naluwas ang nasamdan nga mananagat mao ang mga litrato nga didto sila sa barko sa PCG ug dili sa CCG.
Sa laing bahin, kasamtangang nagpaalim sa tambalanan ang 2 ka mga mananagat nga Pinoy nga nakaangkon og second degree burns tungod sa maong insidente.
