Magpadala ang Philippine Coast Guard (PCG) og barko aron monitoron ug masiguro ang kaluwasan sa ikaupat nga civilian mission sa Atin Ito Coalition sa West Philippine Sea (WPS) sa Abril.
Gikumpirmar ni PCG Spokesperson sa West Philippine Sea, Rear Admiral Jay Tarriela, nga magpadala sila og barko aron magsilbing escort ug masiguro ang seguridad sa mga sibilyan taliwala sa posibleng presensya sa Chinese Coast Guard (CCG).
Kini bisan pa sa kamatuoran nga ang maong misyon usa ka independente nga inisyatibo sa sibilyan.
Sumala ni Tarriela, ang Atin ito convoy usa ka inisyatibo sa sibilyan nga katilingban ug boluntaryo ug wala sila giaghat o gipugos sa pagpahigayon sa ikaupat nga civilian mission.
Sa laing bahin, gidawat sa opisyal sa PCG ang nagkadako nga partisipasyon sa publiko sa maong mga sibilyan nga misyon, nga nagpakita sa taas nga kaamgohan sa mga Pilipino sa pagdepensa sa soberanya sa nasud.
Ang convoy nagtumong sa pagdepensa sa katungod sa Pilipinas sa WPS ug paghatag og suporta sa mga mangingisda ug mga residente sa Pag-asa Island.
Si Rafaela David, co-convenor sa Atin Ito Coalition, sa sayo pa miingon nga ang bag-ong sibilyan nga misyon nagtumong sa pagsulbad sa mga isyu sama sa mga kalihokan sa pagpaniid sa China sa nasud ug ang epekto sa pagsaka sa presyo sa lana sa mga Pilipinong mangingisda.
