Mopatuman ang Philippine Coast Guard (PCG) og mas taas nga seguridad isip pagpangandam sa kalag-kalag sugod Oktubre 30 hangtod Nobiyembre 4.
Kini subay sa mando ni Presidente Ferdinand “Bongbong” Marcos Jr. nga ang PCG mosiguro sa kaluwasan ug kaharuhay sa mga mangbyaheay karong kalag-kalag.
Matod ni PCG Commandant Admiral Ronnie Gil Gavan, iya nang gimandoan ang tanang PCG districts, stations, ug sub-stations nga dugangan ang pagpatrolya sa mga pantalan ug waterways sa tibuok nasod.
Dugang pa, ipahigayon ang makuting inspeksyon sa mga barko ug bagahe gamit ang Coast Guard K9 units sa mga pantalan.
Dili lang sa mga pantalan, ang mga rescuers ug lifeguard sa PCG idestino apan usab sa mga sikat nga beaches, island resorts, ug uban pang coastal areas aron masiguro ang kaluwasan sa mga turista.
Makigtambayayong ang PCG sa Department of Transportation (DOTr), Philippine Ports Authority (PPA), ug Maritime Industry Authority (MARINA) sa pagdumala sa DOTr Malasakit Help Desks.
Padayong nagpahinumdom sa publiko ang PCG nga magmaalerto, mosunod sa safety guidelines, ug makigtambayayong sa mga awtoridad aron masiguro ang luwas nga pagbiyahe karong kalag-kalag.
