Gibalibaran sa Spokesperson sa Philippine Coast Guard (PCG) nga si Commodore Jay Tarriela ang hagit ni Sen. Rodante Marcoleta alang sa usa ka “friendly debate” sa dili pa mobisita sa West Philippine Sea (WPS) ug Kalayaan Island Group (KIG).
Sigon ni Marcoleta nga gusto una niyang makighisgot kang Tarriela, kanhi Associate Justice Antonio Carpio, ug sa direktor sa University of the Philippines Institute for Maritime Affairs and Law of the Sea nga si Jay Batongbacal.
Una nang giimbitar ni Tarriela si Marcoleta nga moapil sa usa ka Maritime Domain Awareness (MDA) flight paingon sa KIG human giingon sa senador nga ang Pilipinas mahimong “i-surrender” ang maong Island group tungod kay ang pipila sa mga bahin niini anaa sa gawas sa exclusive economic zone (EEZ) sa nasud.
Dugang niya nga nagtuo siya nga si Justice Antonio Carpio ug Professor Jay Batongbacal, ingon man ang bisan kinsang Pilipino nga adunay klaro nga pagsabot sa lig-on nga legal nga posisyon sa nasud, mobalibad usab.
Iyang gipasabot nga ang soberanya ug mga katungod sa soberanya sa Pilipinas sa WPS klaro nga giestablisar sa 2016 Arbitral Award, sa Konstitusyon, ug sa kasamtangang mga balaod sa nasud, ug dili bukas sa negosasyon o pagpakita sa publiko.
Gihimug-atan usab ni Tarriela nga isip usa ka senador, katungdanan ni Marcoleta ang pagdepensa niining mga katungod.
Bisan pa niini, gisubli ni Tarriela nga ang iyang hagit kang Marcoleta nga moapil sa usa ka Maritime Domain Awareness flight o sovereign patrol sakay sa usa ka barko sa PCG sa KIG bukas gihapon.
Samtang, ang press officer sa Palasyo nga si Claire Castro miingon sa usa ka press briefing nga samtang ang mga pahayag sa senador dili maisip nga pagbudhi, kadtong nagpadayon sa pagpakatap sa usa ka naratibo nga susama sa propaganda sa China kinahanglan nga andam alang sa posible nga reaksyon sa publiko.
