Wala nay na monitor ang Philippine Coast Guard (PCG) nga construction o reclamation activities sa China sa Bajo de Masinloc o Scarborough shoal.
Matod sa tigpamaba sa PCG sa West Philippine Sea Commodore Jay Tarriela, walay reclamation nga gihimo sa nasangpit nga kadagatan gawas lang sa maritime domain awareness flight nga gihimo sa coast guard ug normal nga pagpatrolya.
Matod niya, ang hagit karon mao ang pagpaduol sa shoal, ilabi na ang pagsulod sa Bajo de Masinloc.
Bag-o lang, ang tigpamaba sa National Security Council (NSC) nga si Assistant Director General Jonathan Malaya mipahimangno nga bisan unsang pagsulay sa China nga himuon ang Bajo de Masinloc nga usa ka artipisyal nga isla giisip nga usa ka paglapas sa “pula nga linya”.
Ang maong pamahayag naggikan taliwala sa padayong pagsaka sa presensiya sa mga barko sa China nga nagpugong sa mga mangingisda nga Pilipino sa pagsulod sa maong shoal sa milabay nga tuig. (Bombo Irene Ardiente)
