CEBU CITY — Giklaro ni Cebu City Councilor Joel Garganera nga magkahiusa ang managlahing sektor sa City Peace and Order Council (CPOC) alang sa pagmentenar sa kahapsay ug kalinaw sa dakbayan.
Gitukod ni Mayor Edgardo Labella ang City Peace and Order Council diin maglangkub kini sa mga sektor sa simbahan, akademya, business, ug media.
Magtapok usab sa maong council ang mga law-enforcement agencies sama lang sa Philippine Drug Enforcement Agency, Philippine National Police, Bureau of Fire Protection, City Prosecutor’s Office, ug uban pa.
Gitataw ni Garganera nga lahi ang responsibilidad tali sa CPOC ug sa Police Advisory Council nga naglangkub lang sa kapulisan.
Dugang pa niini nga dugay nang giplanuhan ni kanhi mayor Tomas Osmeña ang pagtukod sa City Peace and Order Council sa tumong nga ipatuman ug imentenar ang kahapsay ug kalinaw sa dakbayan.
Gi-umol ni Mayor Labella ang CPOC ubos sa Section 16 sa Local Government Code diin gimanduan ang mga local government units nga siguraduhon ang peace and order sa lokalidad alang sa maayong pagpuyo sa mga mulupyo. (GN)
