Gipahimangnoan sa Kalihim sa Depensa sa Estados Unidos nga si Pete Hegseth nga ang rehiyon sa Asia-Pacific ug ang tibuok kalibutan kabahin sa mga pagpangandam sa China nga gamiton ang puwersa militar niini aron mabag-o ang power balance sa Indo-Pacific Region.
Ang Pentagon Chief mihimo sa pasidaan sa iyang pakigpulong sa Shangri-La Dialogue nga usa ka annual forum sa security nga gipahigayon sa Singapore.
Gihisgutan usab ni Hegseth nga ang mga pwersa sa People’s Liberation Army (PLA) kay nagbansay-bansay kada adlaw sa paghimo og aksyong militar batok sa Taiwan.
Gibutyag usab sa Pentagon Chief nga ang lider sa China nga si Xi Jinping nagmando sa iyang militar nga mangandam sa 2027 aron atakehon ang Taiwan, nga giangkon sa China nga teritoryo niini.
Bisan pa niini, siya miingon nga si US President Donald Trump misaad nga dili niya tugotan ang Taiwan nga mahulog sa China ubos sa iyang pamunoan.
Giawhag usab sa opisyal sa Estados Unidos ang mga kaalyado ug kasosyo sa Amerika sa rehiyon nga maghiusa batok sa China, lakip ang isyu sa Taiwan ug uban pang mga panagbangi sa rehiyon kung diin agresibo nga gipauswag sa China ang ilang agenda, sama sa gilalisang teritoryo sa katubigan.
Giawhag usab ni Hegseth ang mga nasud sa Asya nga dugangan ang ilang paggasto sa depensa, nga giingon nga ang mga kaalyado sa North Atlantic Treaty Organization (NATO) nagpataas sa paggasto sa depensa sa 5% sa ilang gross domestic product (GDP).
Samtang, giklaro sa Pentagon Chief nga dili gusto sa Amerika ang panagbangi sa China, apan iyang giinsister nga dili tugotan sa administrasyong Trump nga mopatigbabaw ang agresyon sa China.
