Plano nga moduso ug resolusyon si Cebu City Councilor Winston Pepito, ang Chairman sa Committee on Transportation, human nga makadawat ug sunod-sunod nga mga reklamo, kabahin sa mga taxi drivers nga mangontrata ngadto sa mga pasahero sa pipila ka mga pantalan.
Kini ang gibutyag atol sa pagpakighinabi niya sa Bombo Radyo Cebu, diin iyang gitawtaw nga moduso siya ug resolusyon batok sa mga taxi drivers nga sagad mangontrata ngadto sa mga pasahero, hilabi na bahin sa mga pantalan nga adunay mabiktima.
Ang maong resolusyon, nagtumong sa pagmando sa mga sakop sa kapulisan ug pipila ka sakop sa awturidad nga imbestigaran ug susihon ang posibleng mga insidente, ug mamahimo nga dakpon sa mismong paghimo niini.
Matud ni Pepito, plano niini nga ipadayag sa konseho sunod session aron mahatagan og pagtagad ang mismong problema nga dugay nang nagpadayon.
Giawhag usab sa opisyal ang mga commuters nga mabiktima, nga daling modoul sa iyang opisina o di bakaha sa mga awturisadong mga buhatan sama sa Land Transportation Franchising and Regulatory Board (LTFRB).
