CEBU CITY-Gipahibalo ni Police Colonel Ireneo Dalogdog, ang director sa Cebu City Police Office (CCPO), nga aduna na sila’y “person of interest” sa kamatayon sa 19-anyos nga si Reah Mae Tocmo.
Matud pa, nakita sa closed-circuit television (CCTV) nga nisakay sa usa ka yellow nga motor ang biktima, diin adunay 30 kilometros ang gilay-on sa iyahang gipuy-an sa Barangay Looc, dakbayan sa Mandaue.
Sa pagkakarun, gihatag na sa CCPO ngadto sa Regional Anti-Cyber Crime Unit ang nakuha nga footage sa CCTV arun sa pag-enhance ug makuha plaka sa maong motor.
Giawhag ni Dalogdog ang adunay kasayoran sa panghitabo nga makig-alayon sa kapulisan arun nga mapadali ang pagsulbad sa kamatayon sa biktima.
Sa laing bahin, gitino sa police official nga brutal ang kamatayon sa biktima tungod sa ilahang nasuta nga aduna kini samad nga nakita sa wala nga bahin sa dughan niini.
Gituohan nga ang dugo nga nakita sa habol nga gigamit sa pagputos sa biktima mao ang gikan sa samad sa dughan.
Gipaabot na lang sa kapulisan ang final result gikan sa mga ekperto alang sa dugang ug tukma nga impormasyon mahitungod sa kamatayon ni Reah Mae.
