CEBU CITY-Nailhan na sa mga otoridad ang person of interest sa kamatayon sa usa ka saleslady nga napalgang hubo ug wala nay kinabuhi sulod sa iyang giabangang balay sa Sitio Laguna, Barangay Bulacao, dakbayan sa Sugbo, gahapon Agosto 2, 2024.
Ang 27-anyos lalaki giila nga si Darren Alderson Tejano Cui nga gituohang adunay kalambigitan sa kamatayon sa 27-anyos nga si Charina Baoy Relativo.
Una niini, ang patay’ng lawas ni Relativo napalgan sulod sa iyang giabangang lawak sa Brgy. Bulacao mga alas 12:30 sa udto Biyernes.
Hubo kini ug nasunog ang iyang buhok tungod sa kalayo gikan sa butane stove.
Sa pakighinabi sa Bombo NewsTeam sa ka-ipon sa biktima nga si Johnjie Gaviola, gisaysay niini nga nilakaw siya aron motrabaho mga alas 7 sa buntag sa sama nga adlaw samtang natulog pa si Relativo.
Dugang pa, nga alas 10 sa buntag, gihangyo ni Gaviola ang iyang higala nga susihon si Relativo kay dili kini motubag sa iyang mga text.
Ang iyang higala nga si Anthony Abalaya, miadto sa balay ug nakit-an ang patay nga lawas sa Biktima.
Tungod sa kakuwang sa sapot sa biktima dihang nakit-an, ang mga tinugyanan sa balaod nagtuo nga posibleng gilugos siya.
Apan,sa pagsulat niining balitaa base sa inisyal nga imbestigasyon sa kapolisan,ilang gibutyag nga walay mga timailhan sa pagsulod o bisan unsang mga kadaot nga nagpakita sa kapintasan o sekswal nga pag-atake.
Ang kapulisan sa Inayawan nagpahigayon og hot-pursuit operation ug follow-up nga imbestigasyon sa maong insidente.
Dugang pa, nagpaabot sila sa resulta sa autopsy sa patay nga lawas sa biktima aron masuta ang hinungdan sa kamatayon niini.
