Gipahibalo sa Providence Police nga aduna na silay person of interest nga may kalambigitan sa pagpamusil sa Brown University sa Providence, Rhode Island, nga nakapatay sa duha ka tawo ug siyam ang nasamdan niadtong Sabado (Domingo sa Pilipinas).
Nailhan sa mga awtoridad ang suspek nga usa ka lalaki nga anaa sa iyang 20 anyos ug nadakpan sa usa ka hotel sa Coventry sayo sa Domingo sa buntag, ug wala pa ginganlan ang suspek, apan ang mga awtoridad miingon nga wala silay gipangita nga ubang mga suspek.
Gipaambit usab sa mga awtoridad ang CCTV footage nga nagpakita sa suspek nga nagsul-ob og itom nga sinina, apan walay nakit-ang pusil sa lugar.
Sa laing bahin, gipasalig sa administrasyon sa unibersidad nga ilang tabonan ang mga gasto sa mga biktima sa pagpamusil ingon man ang pagtabang sa ilang mga pamilya.
Sa pagkakaron, gidili ang tanang pagsulod sa unibersidad tungod sa nagpadayon nga imbestigasyon.
Samtang, gitaho ni Mayor Brett Smiley niadtong Domingo nga ang kahimtang sa mga nasamdan nga biktima miuswag, diin 7 kanila ang lig-on na karon, 1 ang kritikal, ug 1 ang nakagawas na sa ospital.
Usa ka prayer vigil ang gihimo usab sa lugar.
