CEBU PROVINCE-Nagpadayon ang imbestigasyon sa kapulisan sa Asturias sa nahitabong pagpusil patay sa barangay kapitan ug sa asawa niini sa national highway sa Barangay Poblacion, atubangan mismo sa Mayor Fabian Aguanta Asturias Central School.
Gibutyag ni Police Major Alden Zambrano, ang hepe sa Asturias Police Station, nga nagkuha sila karun ug dugang mga CCTV footages sa area arun nga ma-trace ang gi-agi-an sa mga mamumuno.
Matud pa niini, ilaha karun nga gisusi ang tanang impormasyon nga ilahang nakuha kansang makatabang sa ilahang gipahigayon nga imbestigasyon.
Gidugang sa hepe nga gitan-aw nila ang personal grudge ug ang trabaho isip kapitan sa barangay, nga motibo sa pagpamusil.
Napanglantawan ni Police Major Zambrano nga hilabihan ka planado ang maong pagpamusil ug posibling mga hard-killer ang mga mamumuno.
Kahinumdoman nga gipusil ang mga biktima samtang sakay sa ilahang motorsiklo pasado alas 9 sa buntag niadtong Marso 13, 2023.
Giila ang mga biktima nga sila si Mario Tundag ug Edna Tundag.
Si Mario kay ang kasamtangan nga kapitan sa Barangay Manguiao, lungsod sa Asturias.
