CEBU – Wala’y mahitabo nga ‘job fair’ sa Public Employment Service Office (PESO) karung umaabot nga Mayo 1 o Labor Day.
Kini sukwahi sa mga nakalabay nga paghandum sa adlaw sa mga mamumuo, gumikan kay ubos sa gihapon ang probinsiya sa Sugbo sa Alert Level 2 status subay sa COVID-19 pandemic.
Gipahibalo ni PESO Head, Julius Chua, nga bugtong ang Department of Labor and Employment (DOLE) lang ang adunay ipahigayon nga job fair sa maong adlaw.
Matud pa, mas maayo nga mudiretso na lang sa DOLE job fair ang mga aplikante, diin ipahigayon sa usa ka dakong mall sa dakbayan sa Sugbo.
Hinuon, gitataw ni Chua nga aduna may ‘job posting’ ang PESO, hinungdan nga ang gustong mag-apply pinaagi sa ilahang buhatan, mas maayo nga magdala na lang sa ilahang mga credentials arun sa ka sayon sa ilahang pag-refer sa mga kompanya kung ugaling kwalipikado ang usa ka aplikante.
Samtang, gipahibalo usab niini nga nagsugod na ug panawat ang PESO ug mga tinun-an nga gustong musulod ug summer job, diin kinahanglan lang mubisita sa ilahang buhatan arun nga ma-orient sa kinatibuk-ang detalye kalabot na sa DOLE SPES program.
