Nipahigayon og Maritime Cooperative Activity (MCA) ang Armed Forces of the Philippines (AFP) inubanan sa mga tropa gikan sa Australian Defense Force ug Royal Canadian Navy (RCN) niadtong Sabado sa habagatan-kasadpang bahin sa El Nido, Palawan.
Ang maong kalihokan kabahin sa tinuig nga ALON Exercises nga sagad gitambongan sa mga tropa gikan sa lain-laing kaalyadong nasud sa Pilipinas.
Karong tuiga, ang naval assets nga gigamit sa maong ehersisyo mao ang BRP Jose Rizal (FF150) gikan sa Philippine Navy samtang ang Royal Australian Navy nigamit sa ilang HMAS Brisbane (DDG41), samtang ang Royal Canadian Navy troops sakay sa HMCS de Quebec (FFH332).
Sumala sa AFP, ang ehersisyo nagpakita sa cross deck hosting ug vertical personnel transfer, diin ilang gigamit ang MH-60 helicopter sa Australia niini nga kalihokan aron malampuson nga mapahigayon kini nga mga ehersisyo.
Samtang, ang nasangpit nga Maritime Cooperative Activity nagpakita lamang sa hiniusang pangandoy sa mga partisipante nga mga nasud sa pagpasiugda sa usa ka rules-based international order sa Indo-Pacific.
Kabahin usab kini sa gipalig-on nga alyansa tali sa Pilipinas, Australia ug Canada aron mamentinar ang kagawasan sa paglawig, kalig-on sa rehiyon ug pagpalig-on sa seguridad sa kadagatan niining mga nasud.
