Gitambagan sa Philippine Embassy sa Thailand ang mga overseas Filipino workers nga mag-amping sa kanunay human sa nahitabong mass shooting sa Nakhon Ratchasima.
Sa report gikan sa Bombo International Correspondent nga si AJ Orillosa, usa ka English teacher sa Phitsanulok City, gibutyag niini nga mipahimango ang embahada kanila nga dili magpagabii, kung mahimo.
Matud ni Orillosa, kinsang lumad nga taga-Talisay City, Cebu, nga kinahanglang magpakuyog kun ugaling adunay lakaw sa panahon sa kagabihon.
Dugang pa niini nga dili sila mokumpyansa bisan pa man nga nabalik na sa normal ang ilang kahimtang.
Gibutyag usab ni Orillosa, nga hinay-hinay nang naka-move on ang iyang mga kaila sa Nakhon Ratchasima human sa maduguon nga mass shooting nga miresulta sa kamatayon sa suspek nga si Jakrapanth Thomma, usa ka rank military officer.
Samtang nakita sa laing English teacher sa Bangkok nga si JR Daan nga nakugang ang iyang mga higala human sa nahitabong mass shooting sa Terminal 21 Mall sa nahisgutang syudad.
Matud ni Daan, kinsang lumad nga taga-Minglanilla, Cebu, nga nag-ampo karon sa mga Pilipino ang kapahulayan sa 29 ka mga biktima sa maong pagpamusil.
Dason pa niini, nga sirado pa ang maong mall human sa duguon nga insidente.
Mipadangat na usab og pag-ampo ang mga mulupyo sa maong lugar ug nagpadala sila og buwak, ingon man kandila.
