Makigtimbayayong ang gobyerno sa Pilipinas sa Office of the United States Trade Representative (USTR) sa nagpadayon nga imbestigasyon niini sa giingong dili patas nga mga pamaagi sa pamatigayon, lakip ang giingong pinugos nga pagtrabaho, sa 60 ka mga ekonomiya, lakip ang Pilipinas.
Nag-ingun si Trade Secretary Cristina Roque nga ilang gikonsiderar ang nagpadayon nga mga imbestigasyon sa Section 301 nga bag-o lang gilunsad sa Estados Unidos batok sa 60 ka mga ekonomiya.
Ingun man ilang bantayan pag-ayo ug aktibong moapil sa imbestigasyon aron matubag ang mga kabalaka sa Estados Unidos.
“We take note of the ongoing Section 301 investigations recently launched by the United States against 60 economies. We will closely monitor and actively participate in the investigation to address the concerns of the United States.”
Samtang ang USTR miingon nga ang ikaduhang serye sa mga imbestigasyon sa Section 301 nagsugod na sa 60 ka mga ekonomiya nga may kalabotan sa giingong kapakyasan niining mga nasud sa pagpugong sa paggamit sa pinugos nga pagtrabaho.
Matod usab ni Jamieson Greer, US Trade Representative, ang maong mga imbestigasyon magtino kung ang mga langyaw nga gobyerno nakahimo ba og igo nga mga lakang aron pagdili sa pag-import sa mga produkto nga gihimo gamit ang pinugos nga pagtrabaho ug kung giunsa ang kapakyasan sa pagwagtang niining mga dulumtanan nga mga pamaagi makaapekto sa mga trabahante ug negosyo sa US.
“These investigations will determine whether foreign governments have taken sufficient steps to prohibit the importation of goods produced with forced labor and how the failure to eradicate these abhorrent practices impacts US workers and businesses.”
Subay niini, ang lista sa 60 ka mga nasud ug ekonomiya naglakip sa pipila sa mga nag-unang kauban ug kaalyado sa US, sama sa Australia, Canada, European Union, United Kingdom, Israel, India, Qatar, ug Saudi Arabia. Nalakip usab sa listahan ang China ug Russia.
