Hingpit ug walay paglubad nga nagsuporta ang Pilipinas sa resolusyon sa United Nations nga nanawagan sa hinanali, walay kondisyon ug permanenteng ceasefire sa gubat sa Gaza.
Usa ang Pilipinas sa 149 ka nasod nga nibotar pabor sa resolusyon, diin adunay 12 ang misupak samtang 12 usab ang ni-abstain.
Lakip sa mga nasud nga misupak mao ang Estados Unidos, Argentina, Hungary, Paraguay ug Israel, nga nagpadayon sa ilang opensiba sa Gaza, nga gituohan nga usa ka dangpanan sa mga militanteng Hamas.
Sa resolusyon nga gisagop sa UN General Assembly, kusganong gikondenar niini ang bisan unsang porma sa kagutom sa mga sibilyan isip pamaagi sa pakiggubat ug ang dili makatarunganon nga pagdili sa humanitarian access sa Gaza.
Gipahayag usab sa General Assembly nga ubos sa internasyonal nga balaod, ang Israel obligado sa pagsiguro nga ang humanitarian aid makaabot sa tanang mga tawo nga nanginahanglan sa Gaza ug nangayo sa hinanali ug permanente nga probisyon sa luwas ug walay pagbabag sa mga entry point alang sa mga goods sa tibuok Gaza.
Gipangayo usab pag-usab ang hinanali ug walay kondisyon nga pagpagawas sa tanang nahibiling mga hostage sa Hamas ug uban pang grupo.
