Andam na ang sakop sa Philippine Red Cross-Cebu alang na sa umaabot nga bloodletting campaign nga ipahigayon sa SM City Cebu, 3rd floor, Cinema B Hallway, Sabado, Nobyembre 15.
Mao kini ang gikabutyag ni Keen Lester P. Espanto, RM, Quality Assurance Officer sa Philippine Red Cross-Cebu nga nag-finalize na usab sila sa mga ekipo nga pang gamiton, gidaghanon sa personnel, ug ang layout sa umaabot nga inilang bloodletting campaign.
Atol sa ekslusibong pakighinabi kaniya sa Bombo Radyo Cebu team kaniya lakip sa iyang naasoy nga 85-90% ang kaandam na nila sa maong kalihokan.
Subay niini, gikabutyag niya nga adunay ubay-ubay nga mga bloodletting campaign ang nakansela gumikan na sa nagsunod-sunod nga mga kalamidad nga nahitabo sa kasamtangan.
Apan, mapasalamaton gihapon kini og dako sa Bombo Radyo Philippines-Bombo Radyo Cebu sa nitumaw nga pakig-alayon niini sa maong buhatan kay usa kini nga paagi nga madugangan ang suplay sa dugo, ilabi na nga daghan kaayong katawhan ang nanginahanglan niini.
