Kulelat ang mga estudyanteng Pinoy sa pinakaulahing Creative Thinking Assessment sa Program for International Student Assessment (PISA) nga gipahigayon sa Organization for Economic Cooperation and Development (OECD).
Sa nasangpit nga assessment, ikaduha ang Pilipinas sa pinakaubos nga mean score sa Creative Thinking Assessment nga adunay score nga 14, uban sa Uzbekistan, apan mas taas kay sa Albania nga maoy pinakaubos sa tanang nasud nga misalmot sa pagtuki.
Ang score sa Pilipinas mas ubos sa mean score nga 33, nga mao ang Economic Cooperation and Development (OECD) average.
Mas ubos usab ang ranggo sa Pilipinas kon itandi sa PISA average kon bahin sa creative thinking performance sa mga babaye ug lalaki, diin ang mga babaye adunay mean score nga 16 ug ang mga lalaki adunay score nga 12.
Sumala sa OECD, ang Pilipinas, uban sa Albania, Brunei Darussalam, Bulgaria, Macao, Morocco, ug Uzbekistan, nagpakita sa labing dakong kahuyang sa kinatibuk-ang mamugnaong panghunahuna, nga adunay labing menos tulo ka puntos kon itandi sa gipaabot nga pasundayag base sa matematika ug pagbasa.
Gitino ni Andreas Schleicher, OECD director for education and skills and special advisor on education policy to the secretary-general, nga ang pagtimbang-timbang sa critical thinking kay natural progression alang sa PISA.
Ang mga resulta niabot human sa pinakaulahing PISA assessments sa pagbasa, matematika, ug siyensiya nga nagpakita sa mga estudyanteng Pilipino nga naulahi sa ilang mga kaedad gikan sa Southeast Asia.
Kini ang pinakaulahing hagit nga giatubang sa sistema sa edukasyon sa Pilipinas, nga nagtubag sa panginahanglan sa mas lawom nga pagsabot ug pag-uswag sa abilidad sa mga estudyante sa paghunahuna nga mamugnaon.
