Mipirma ang Pilipinas ug Japan og kasabutan sa pautang kun loan deal alang sa duha ka proyekto sa imprastraktura sa Metro Manila ug Mindanao niadtong Biyernes, Marso 27, 2026.
Lakip sa mga kasabutan nga gipirmahan mao ang Ika-upat nga Tranche Loan alang sa Phase 1 sa Metro Manila Subway Project (MMSP-1), nga gipondohan sa gobyerno sa Japan pinaagi sa Japan International Cooperation Agency (JICA).
Nagkantidad ang pautang og 220 bilyon yen o gibana-bana nga P84.81-bilyones.
Ang mga mipirma naglakip sa Department of Transportation (DOTr), Department of Foreign Affairs (DFA) ug ang Embahada sa Japan sa Pilipinas.
Gipasabot sa DFA nga ang proyekto nagtumong sa pagtubag sa nagkataas nga panginahanglan alang sa transportasyon, pagpagaan sa grabeng trapiko sa rehiyon ug pagtabang sa pagsulbad sa polusyon sa hangin ug pagbag-o sa klima.
Gipirmahan usab ang kasabutan sa pautang alang sa Central Mindanao High Standard Highway Construction Project nga naglangkob sa Cagayan de Oro-Malaybalay Section ubos sa Department of Public Works and Highways (DPWH), nga pondohan usab sa JICA.
Nagkantidad ang pautang og 1.672 bilyon yen o gibana-bana nga P644-milyones. Gilauman nga kini makapamenos sa oras sa pagbiyahe tali sa Cagayan de Oro ug Malaybalay gikan sa unom ug tunga ka oras ngadto sa tulo ug tunga ka oras.
Ang proyekto gitarget nga ipatuman sulod sa walo ka tuig gikan sa 2026 hangtod 2034 samtang ang Metro Manila Subway Project gilauman nga mahuman sa 2031.
