Daling gi-veto sa Board of Directors sa Philippine Health Insurance Corp. (PhilHealth) ang gisugyot nga pagpalit og P37.5 milyones nga kantidad sa mga butang alang sa ika-30 nga anibersaryo sa state health insurer sa buwan sa Pebrero 2025.
Ang maong kantidad bahin sa marketing ug promotional expenses alang sa opisyal nga kalihukan sa Philhealth.
Nagkanayon ang Department of Health nga ang board of directors sa Philhealth nga gipangulohan ni Health Secretary Ted Herbosa nakahukom nga kanselahon ang gisugyot nga pagpalit aron makadaginot sa pundo sa gobyerno ug masiguro ang saktong alokasyon alang sa mga benepisyo sa mga sakop sa Philhealth.
Lakip sa gisugyot nga paliton alang sa anibersaryo sa state health insurer mao ang mga payong, Perforated mesh stickers, Tote Bags, Anniversary shirts,Marketing shirts, Mga jacket, Katsa bags ug Button pins.
Sa laing bahin, sa habig sa Philhealth, una niini nga giklaro niadtong Miyerkules nga mogasto lang sila og ‘few hundreds thousand pesos’ alang sa ilang ika-30 nga anibersaryo sunod tuig ug dili ang pasiunang plano nga P138 milyones.
Ang presidente ug CEO sa Philhealth nga si Emmanuel Ledesma Jr. giklaro sa hearing sa Senate Committee on Health and Demography nunot sa pagsaway sa pipila ka mga Senador sa inisyal nga sugyot sa pondo sa ahensya alang sa ilang anibersaryo.
