Gipangunahan sa PhilHealth Regional Office VII ang opisyal nga pagtunol sa Certificate of Accreditation ngadto sa Bureau of Jail Management and Penology (BJMP) Alima Inc. Primary Care Facility atol sa pagsaulog sa National Women’s Month niadtong Marso 26, 2026, didto sa Cebu City Jail Female Dormitory Visiting Area, isip paglunsad sa PhilHealth Yaman ng Kalusugan Program (YAKAP) alang sa mga persons deprived of liberty (PDL).
Nahimong unang BJMP-accredited YAKAP Clinic sa tibuok Visayas ug Mindanao ang maong pasilidad nga maghatag og serbisyo ngadto sa mga PDL, ilang mga pamilya, ug mga kawani sa BJMP aron mas mapadali ang pag-access sa primary healthcare services sulod sa prisohan.
Gipadayag ni BJMP Regional Director JCSUPT Luisito C. Muñoz, CESE, ang dakong importansya sa maong inisyatiba alang sa BJMP Regional Office VII, diin gipasabot niya nga usa kini ka mahinungdanong lakang sa pagpalig-on sa ilang serbisyong medikal nga naghatag og libreng konsultasyon, laboratory services, ug mga tambal alang sa mga PDL ug ilang mga dependent.
Giklaro usab nga naghupot sa baruganan nga ang tinuod nga serbisyo publiko dili lang kutob sa pagbantay sa mga priso, kundili apil usab ang pagpanalipod sa kinabuhi, pagpalambo sa kahimsog, ug pagpreserbar sa dignidad sa tawo.
Gipahibalo usab ni PhilHealth Regional Vice President Marjorie A. Cabrieto nga dako ang makuha nga benepisyo sa programa dili lang alang sa mga PDL kundili lakip na ang ilang mga pamilya nga makapahimulos usab sa mga serbisyo sa maong klinika.
Nagpamatuod ang maong kalihokan sa mas napalig-on nga panagtambayayong tali sa PhilHealth ug BJMP sa paghatag og serbisyong panglawas nga inklusibo, dali maabot, ug responsibo alang sa mga komunidad nga nanginahanglan og dugang nga pag-atiman dinhi sa rehiyon.
