CENTRAL VISAYAS-Mibisita si Philippine National Police Chief General Benjamin Acorda Jr sa Negros Oriental Police Provincial Office sa unang higayon sukad siya milingkod sa katungdanan.
Ang iyang pagbisita duha ka bulan human sa dugoon nga Pamplona massacre nga misangpot sa pagpatay kang Negros Oriental Gov. Roel Degamo ug walo pa.
Lakip sa iyang gitan-aw mao ang kabug-at sa problema sa seguridad sa probinsiya human sa maong makabungog nga krimen, ilabi na sa ilang imbestigasyon nga nasuta nga ubay-ubay nga mga insidente sa krimen ang wala giseryoso sa kapolisan.
Matod ni Police Lieutenant Colonel Gerard Ace Pelare, ang tigpamaba ni Police Regional Office 7 Regional Director Police Brigadier General Anthony Aberin, hinay-hinay na nga nibalik sa normal angkahimtang sa Negros Oriental pinaagi sa tabang sa nagkadaghang presensya sa kapulisan ug militar sa kadalanan.
Sa laing bahin, laing kamandoan usab ang gihatag ni Acorda atol sa maong command conference uban sa tanang mga hepe sa buhatan sa kapolisan sa dakbayan ug probinsiya sa rehiyon, mao ang pagtan-aw sa mga hulga sa seguridad subay sa umaabot nga barangay elections.
Dugang pa ni Pelare nga andam ang kapulisan sa paghatag og seguridad madayon man o dili ang piniliay sa Oktubre sanglit anaa na ang ilang security plan ang Negros Oriental.
Iyang giklaro nga ang kapulisan ug militar nakatutok sa nasangpit nga probinsiya nunot sa pagpatay sa gobernador niadtong Marso, ug gawas niini, ila usab nga gibantayan pag-ayo ang pagpangita sa mga wanted nga indibidwal nga nalambigit sa nagkadaiyang krimen.
