CEBU CITY – Subli nga mipahimangno si Dr. Amor Cielo Cantillas, blood center manager sa Philippine Red Cross, niadtong mga ‘potential blood donors’ nga likayan una ang pag-inom ug ilimnong makahubog, mupahuway ug tarong, ingun man mukaon una sa dili pa magpakuha ug dugo arun nga dili malipong.
Gibutyag ni Dr. Cantillas nga kinahanglan nga sundon sa mga ‘first timer’ ingun man regular blood donors, ang mga angayan ug dili angayan nga buhaton una nga magpakuha ug dugo arun nga malikay sa mga ‘untoward incidents’.
Samtang, gipasabot niini nga sa matag adlaw gikinahanglan nga masudlan nila ug 50 ngadto sa 80 ka bags ang blood bank arun nga wala’y malibaran sa mga nagkinahanglan hinungdan nga giawhag niini ang tanan nga musalmot sa Dugong Bombo 2019.
Nagkanayon si Dr. Cantillas nga karung umaabot nga buwan sa Disyembre ug Enero ang tinghurot sa supply sa dugo hinungdan nga niining mga buwana usab hilabihan nga gikinahanglan ang mga blood donations.
Ang Dugong Bombo ang nationwide blood letting activity ug tinuig nga civic action project sa Bombo Radyo Philippines isip tubag sa panginahanglan ilabi na ang kakuwang sa suplay sa dugo subay na sa nagkasaka nga kaso sa dengue lukop Pilipinas.
Ugmang adlawa, Nobyembre 16, ipahigayon ang Dugong Bombo 2019 sa SM City Cebu ug Super Metro Lapu-Lapu.
