Nipasidaan ang Philippine Space Agency (PhilSA) sa posibleng pagkahulog sa mga debris gikan sa rocket nga gilusad sa China nga “Long March 5” kagahapon, Biyernes, Mayo 3 sa kadagatan nga sakop sa Pilipinas.
Gitino sa ahensya sa usa ka pahayag nga ang mga debris gikan sa rocket gilauman nga mahulog sa mga gitumbok nga drop zones nga gibanabana nga 123 nautical miles ang gilay-on gikan sa Panatag shoal ug 55 nautical miles gikan sa Panay Island sa Catanduanes.
Kalabot niini, gipahimangnoan ang mga residente sa lugar nga ipahibalo dayon sa lokal nga awtoridad kung adunay makita nga kadudahang mga debris sa maong rocket.
Matod sa PhilSA, bisan pa man sa ilang panagna nga dili makita nga mahulog kini sa yuta o populated areas, hulga gihapon kini sa mga barko, eroplano, bangka ug uban pang marine vessel nga moagi sa giila nga drop zone.
Dugang pa, nga adunay posibilidad usab nga molutaw ang mga basura sa maong dapit ug mabanlas sa mga silingang baybayon.
Gipahimangnuan usab ang katawhan nga likayan ang pagduol o pagkuha sa maong mga debris tungod kay aduna kini mga salin sa makahilong mga butang sama sa rocket fuel.
Una niini, gilusad sa China ang maong rocket sa Wenchang Spacecraft Launch Site sa Wenchang, Hainan, China alas 5:27 sa hapon niadtong Biyernes, Mayo 3.
