Giklaro sa PHIVOLCS Kanlaon Volcano Observatory sa La Carlota City, Negros Occidental nga wala pa makompirmar nga lahar ang gikataho nga midagayday sa daghang mga agianan sa tubig sa La Castellana ug Moises Padilla, parehong mga lungsod sa probinsya duol sa bulkan.
Matod ni Darryl Aro, Science Analyst sa PHIVOLCS -La Carlota Substation, sa pagkakaron padayon pa ang ilang team sa pagtuki sa nahitabo ug basi sa ilang inisyal nga assessment, makonsiderar lang kini nga mud flow.
Gipasabot ni Aro, lahi sa lahar sa Pinatubo nga naglakip sa dagkong mga bato, diin makita sa inisyal nga pagtuki nga puro abo ang tubig nga miagas sa mga agianan sa tubig sa duha ka lungsod.
Bisan pa niini, gipahimangnoan gihapon sa PHIVOLCS ang mga residente ug gipugngan sila nga makasulod sa 4 kilometer radius Permanent Danger Zone samtang padayon nga gimonitor ang kahimtang sa bulkan.
