Giklaro ug tataw ni Engineer Robinson Jorgio, ang Director sa DOST-PHIVOLCS Visayas Cluster Monitoring Center For Earthquake And Tsunami, kalabot sa impormasyon nga iyang gikabutyag agi’g pasidaan bahin sa usa ka “potentially active fault” sa Sugbo nga mahimong makamugna og magnitude 7.2 ngadto sa 7.5 nga linog kon kini mahitabo.
Matod ni Jorgio, ang magnitude sa usa ka linog magdepende sa gitas-on sa fault line.
Mao kini ang iyahang gikabutyag sa eksklusibong pakighinabi sa Bombo Radyo Cebu kaniya, diin iyahang gidugang nga sa Sugbo, adunay daghang gitawag nga “potentially active fault” nga nailhan nga Central Cebu Fault System (CCFS). Diin, nahimutang kini duol sa Cebu City, ang fault mahimong makamugna og magnitude 7.2- 7.5 nga linog kon mahitabo, nga nagpataas sa kabalaka bahin sa posibilidad sa “The Big One.”
Samtang, gikanayon usab ni Jorgio nga ang mga naasoyng possibleng magnitude sa linog, mamahimong maka generate og intensity 8 sa tibuok Cebu.
Dugang pa niya, ang intensity 8 mao na kini ang lebel nga maglisud na og tindog o barug ang mga katawhan niini atol sa pag-uyog sa yuta.
Samtang sa kadaot usab sa imprastraktura, iyahang giklaro nga kung unsa ang namatyagan sa histsura sa Mindanao human sa 7.8 magnitude nga linog nga niigo niadtong Hunyo 8, susama ra usab nga kadaot ang posibleng masinati sa Sugbo ugaling mahitabo ang naasoy ang intensity.
Gihimug-atan usab ni Jorgio nga ang maong pahibalo kabahin sa fault lines, dili kini matang sa usa ka pagpanghadlok, inay pahimangno kini sa katawhan nga possible gayud kining mahitabo ug angayan nga pangandaman.
Ilabi na nga sa katergoryang Central Cebu Fault System (CCFS)—kinsa gikonsiderang “potentially active fault” nga naa sa South Cebu, gawas nalang sa Bogo fault ug offshore fault.
Hinuon, giklaro niya nga ang maong Central Cebu Fault kayo sa syudad sa Sugbo, anaa kini posibleng madomdoman sa kabukiran.
