Gipasalig sa pamunoan sa Armed Forces of the Philippines (AFP) nga andam ang Pilipinas nga makigbatok sa mga mosuway sa pag-okupar sa atong teritoryo.
Mao kini ang gipasiugda ni AFP Chief of Staff General Romeo Brawner sa nagpadayong hagit nga giatubang sa Pilipinas batok sa China, partikular na ang isyu sa West Philippine Sea.
Gipasiugda ni Brawner nga tungod sa modernisasyon sa AFP, layo na ang naabot sa nasud bahin sa depensa.
Dugang ni Brawner, kung adunay gustong mosakop sa Pilipinas, makig-away gayud ug masamdan usab ang mosuway sa pag-okupar.
Gipasabot ni Brawner nga ang mas lig-on nga kapabilidad sa depensa sa nasud tungod sa modernong kahimanan nga ania kanato karon, diin giaprobahan ni Presidente Ferdinand Marcos jr.
Gipahibalo ni Brawner nga ang pundo nga gigahin sa gobyerno alang sa ikatulong hugna sa modernisasyon sa AFP o ang horizon 3 alang sa comprehensive archipelagic defense concept.
Gisaysay sa opisyal nga mas daghang barko ug corvette o mas naila nga mga barkong iggugubat ingon man jet fighter ang naglinya nga paliton.
Gipasigarbo usab ni Brawner nga ubos sa modernisasyon nga aduna na kita’y radar defense system, surveillance system ug ang pinakabag-o nga missile system nga matod niya makapalunod sa barko.
