CEBU CITY – Dili na ‘safe’ ang Pilipinas.
Kini ang gituhu-an ni May Paner o mas naila nga ‘Juana Change’ hinungdan nga iyahang namugna ang monologue nga gititulohan ug “Tao Po”.
Sa eksklusibo nga pakighinabi sa Bombo Radyo Cebu, gibutyag ni Paner nga mikuyanap na ang ‘extrajudicial killings’ o EJK lukop nasud gumikan sa ‘war on drugs’ sa Duterte administration ug mao kini ang unod sa iyahang monologue.
Sa mao nga play gidala ni Juana Change ang upat ka karakter diin mao ang reporter, inahan, pulis kinsang giingong ‘vigilante’, ug ang usa ka bata kinsang saksi sa pagpatay sa iyahang ginikanan human nga gi-tokhang.
Gipasabot niini nga ‘research-based’ ang maong monologue ug gani napasundayag na usab kini niini sa international scene.
Gidugang pa sa nahisgutang aktibista nga kinahanglan nga dili makalimtan sa gobyerno nga ang kining mga biktima sa EJK, mga tawo usab kini nga aduna pa’y tsansa nga mag-usab hayan dili maayo nga pamatyon na lang.
Dinhi sa Sugbo, ipasundayag ang “Tao Po” karung gabii sa Fo Guang Shan Chu Un Temple nga nahimutang sa 246 V Rama Ave, Cebu City.
