Gihangop sa Pilipinas ang giluwatang pamahayag sa mga lider sa Group of 7 (G7) nga nagkondena sa agresibo nga mga aksyon sa China sa gilalisan nga kadagatan.
Sa samang higayon, nanawagan usab ang PH sa China nga hunongon na ang pagtuis sa mga kamatuoran, delikadong aksyon ug pagpanghasi batok sa mga barko ug mga personahe sa Pilipino.
Sa usa ka pahayag nga gipagawas pinaagi sa Department of Foreign Affairs (DFA), kini nag-ingon nga ang hiniusang pahayag sa G7 nga naglakip sa mga lider sa Italy, Germany, US, UK, Canada, France ug Japan nagpakita sa ilang pasalig sa pagsuporta sa mga lagda nga gibase sa internasyonal nga kahusay ug lagda sa balaod sa lain-laing mga bahin sa kalibutan.
Ang DFA usab miingon nga ang PH nagkahiusa sa panglantaw sa G7 alang sa usa ka lig-on ug luwas nga Indo-Pacific nga rehiyon ug nagbarog batok sa bisan unsang mga aksyon nga makadaut sa internasyonal nga seguridad ug kahusay.
Dugang pa, nga ang China kinahanglan usab nga mohunong sa ilahang makapukaw nga kinaiya ug pagtuis sa mga kamatuoran, lakip na ang paghimo ug pagpatuman sa lokal nga mga balaod ug regulasyon sa legal nga pagpanag-iya sa mga maritime zone sa Pilipinas, nga usa ka paglapas sa internasyonal nga balaod.
