Nagpagawas ang Reporters Without Borders, usa ka internasyonal nga non-government organization sa ranking sa World Press Freedom Index alang sa 2024, subay sa pagsaulog sa World Press Freedom Day gahapong adlawa.
Gikan sa kinatibuk-ang 180 ka nasod ug teritoryo nga gi-analisa sa maong organisasyon, ang Pilipinas nakasulod lamang sa ika-134 nga puwesto sa 2024 World Press Freedom Index, nga nagtumong sa pagtandi sa lebel sa kagawasan nga natagamtaman sa mga tigbalita ug media worker sa lain-laing nasod sa kalibotan.
Mas ubos kini kon itandi sa ika-132 nga ranking sa nasod sa miaging tuig.
Kini nga ranggo gibase sa lainlaing mga timailhan sama sa impluwensya sa politika, ekonomiya, ug seguridad alang sa mga peryodista.
Karong tuiga, nakakuha lang ang nasud og global score nga 43.36 sa kini nga index, hinungdan nga ang Pilipinas giklasipikar nga usa ka “lisud nga nasud alang sa mga tigbalita”.
Kung diin ang anaa sa ika-100 mao ang pinakataas nga marka nga makuha sa mga nasud sa World Press Freedom Index.
Matod pa sa taho, niminos na ang pag-atake sa media sukad sa paglingkod ni Presidente Ferdinand Marcos Jr. sa posisyon kon itandi sa panahon ni kanhi Presidente Rodrigo Duterte nga naapil kaniadto sa listahan sa mga global “press freedom predator” sa maong organisasyon.
Bisan pa niini, nabalaka gihapon ang kahimtang sa mga trabahante sa media sa nasud, ilabi na kay kaylap gihapon ang red-tagging sa mga tigbalita.
Dugang pa, nabalaka usab ang Reporters Without Borders sa impluwensya sa media sa dagkong mga ngalan sa politika, lakip ang ilang pagpanag-iya sa mga kompanya sa media.
Gipadayag usab sa pagtuon nga mikunhod ang suporta ug pagtahod sa awtonomiya sa media sa tibuuk kalibutan samtang ang pagpit-os ug hulga gikan sa gobyerno ug pipila ka mga politiko miuswag.
